“Eagle has landed”

आर्मस्ट्राँग यांच्याबद्दल मला आदर वाटण्याची आणखी दोन कारणे होती.
पहिले म्हणजे, ते अत्यंत शांत स्वभावाचे (ice-cool guy) होते. एक 'टेस्ट पायलट' म्हणून, अंतराळाच्या सीमेवर 'X-15' जेट विमानांची चाचणी करताना त्यांनी अनेकदा आपल्या जीवाची बाजी लावली होती.
'जेमिनी-८' (Gemini 8) मोहिमेदरम्यान, त्यांचे अंतराळयान एका धोकादायक स्थितीत सापडले आणि एका सेकंदाला एक फेरी या वेगाने गरगर फिरू लागले. बेशुद्ध पडण्याच्या स्थितीत असतानाही, आर्मस्ट्राँग यांनी अत्यंत कौशल्याने  अंतराळयानावर नियंत्रण मिळवले.

चंद्रावर उतरण्याची मोहीमही काही सोपी नव्हती. सुरुवातीलाच, चांद्रयानाच्या संगणकावर कामाचा अतिताण (ओव्हरलोड) आला आणि त्याने धोक्याचे इशारे (अलार्म्स ) देण्यास सुरुवात केली.  आर्मस्ट्राँग यांनी खिडकीतून बाहेर पाहिले आणि त्यांच्या लक्षात आले की, यानाची मार्गदर्शक प्रणाली (गाइडन्स सिस्टम) त्यांना थेट एका भल्या मोठ्या विवरात  घेऊन जात होती. चांद्रयानाचे नियंत्रण स्वतःच्या हातात घेऊन, आर्मस्ट्राँग यांनी यान सुरक्षित जागेकडे नेले. असे करत असताना आणखी एक समस्या उद्भवली: इंधन संपत आले होते. काही अत्यंत तणावपूर्ण मिनिटांनंतर, इंधन संपायला अवघे १५ सेकंद शिल्लक असताना आर्मस्ट्राँग यांनी यान चंद्रावर सुरक्षितपणे उतरवले, आणि मानवी इतिहासातील ते अजरामर उद्गार काढले: Eagle has landed.

चंद्रावर चालणे (मूनवॉक) पूर्ण केल्यानंतर, जेव्हा आर्मस्ट्राँग आणि आल्ड्रिन चंद्राच्या पृष्ठभागावरून परत उड्डाण करण्याच्या तयारीत होते, तेव्हा त्यांच्या लक्षात आले की इंजिन सुरू करण्यासाठी आवश्यक असलेला 'सर्किट ब्रेकर' तुटला होता. तो उपलब्ध नसल्यास त्यांना चंद्रावरच अडकून पडावे लागले असते! परंतु समयसूचकता दाखवून,  सर्किट पूर्ण करण्यासाठी, त्यांनी फाउंटन पेनच्या निबचा वापर केला आणि चंद्रावरून यशस्वीरीत्या उड्डाण केले.