जगी सज्जनांचे कृपाळू असावे
वधी दुर्जनांते पुन्हा ते स्मरावे
कटींचे कर सोडूनी देत आता
पुन्हा शस्त्र ते आज हाती धरावे.
तिथी आजची ही असे देवशयनी
पुरा काळ हा चार मासे धरूनी
करोनीस शक्ती संचया त्वां उठावे
पुन्हा शस्त्र ते आज हाती धरावे.
असे पातली रोगराई विपत्ती
चहू बाजूनी संकटे घेरताती
चिनी त्यातूनी डंख मारी स्वभावे
पुन्हा शस्त्र ते आज हाती धरावे.
गुळाची जशी गोडी ना गाढवांस
तशी ही स्थिती जाहली भारतात
तया दाविण्या धाक सिद्ध रहावे
पुन्हा शस्त्र ते आज हाती धरावे.
जसे रावणा राघव मारताहे
जसा अफजला श्रीशिव फाडताहे
पुन्हा गर्दीला राष्ट्रशत्रू मिळावे
पुन्हा शस्त्र ते आज हाती धरावे.
असू आत्मविस्मृत आम्ही जरिही
कृपेने तुझ्या सावरू त्यातूनीही
अनुनायी होऊ, नायके तू असावे
पुन्हा शस्त्र ते आज हाती धरावे.
